呢個世代男男女女嘅性別區分已經好難憑肉眼定斷，就好似鍾意着緊身衫嘅美國人氣女歌手LadyGaGa都有傳佢係「雌雄同體」，歌手係男係女無傷大雅，因唔涉及任何公平競賽原則。
反而，喺體育界有「男子」選手參加女子組賽事就肯定唔得，一定要驗明正身，咁先確保公平，而周三喺柏林世錦賽贏咗女子800米冠軍嘅18歲南非選手薩美雅（CasterSemenya），就爆出俾國際田聯（IAAF）要求做性別測試（GenderverificationTest），搵咗婦科、性別、內科、心理同生殖內分泌嘅專家斷定，以求驗出薩美雅係咪「真女人」，唔係「杜絲先生」。

薩美雅要做性別測試

薩美雅今次又唔係破咗世績，點解引起咁大迴響？皆因佢今次以1分55秒45奪冠，快第2名衞冕嘅肯雅選手捷高絲姬2秒45，仲較08年10月時自己嘅成績快7秒。薩美雅咁樣贏成條街嘅創舉，真係好似唔係一般「女子」做到嘅事情；加埋佢嘅樣貌、聲線同肌肉線條似足一個成年男人，就好令人懷疑佢究竟係咪「男扮女裝」，搞到國際田聯都要求佢做性別測試，但報告起碼等幾個禮拜先有結果。
不過，國際田聯此舉就搞到薩美雅嘅父母要為「女兒」討回公道，佢哋大聲疾呼話女兒係「GoldenGirl」，佢嘅教練話唔信可以問薩美雅喺柏林嘅同房，話佢哋一齊冲凉時一眼望晒，就係最好證明！之不過正如國際田聯嘅發言人所講：「呢單嘢真係好複雜，一個人嘅性別，唔單只取決於佢嘅性徵！」睇嚟，薩美雅事件仲有排搞喎！