香港人戀日程度一向瘋狂，我自己亦一樣，去日本Shopping嘅次數都多到唔記得。但係我相信好多人有共鳴就係日本人英文好差，好多時買嘢都會出現牛頭唔搭馬嘴嘅情況。想問路？真係難度極高。我自己就試過搵唔到HeadPorter，一心諗住行到裏原宿嗰頭，咁出名實有人識嘞啩？點知佢哋講極都唔明，最後我醒起佢哋好多英文都要加尾音，我就問：「知唔知HeadoPotero喺邊呀？」咁佢哋就立刻給我一副完全明白了嘅樣兼帶咗我去。我心諗，分別真係咁大咩？日本人真係唔會同你估，佢哋聽唔明嘅英文就會一口拒絕話唔識，真蠢！

今期6月號《Smart》就有全日本人氣店舖地圖指南，想知有邊間人氣至勁商店，一覽無遺之餘更可以清楚位置所在，不過最奇怪係這個附錄好似專為外國人而設咁，之但係又全日文噃！近期最新雜誌之中全部送嘅都係垃圾，就只有呢本《Smart》送嘅Supreme毛巾最正，閒閒哋一件Tee都成千，𠵱家有條毛巾送，本雜誌又即刻抵番晒喇！