韓國人氣育兒節目《超人回來了》今日播出最新一集，國腳老竇李同國就帶住大發BB及兩個女去玩攀岩，岩壁仲要有10米高，觀眾都好關注到底3位小朋友成唔成功。

一開始，現年3歲嘅大發BB好有信心去試，點知爬到3米高時，佢似乎因為太高而覺得好驚，停低表示要放棄。四家姐秀雅一次過攀上頂峰，但三家姐雪雅就爬到一半話想放棄，最終喺老竇嘅打氣下同樣成功。不過因為兩個家姐嘅成功，令大發BB感到氣餒，李同國為咗鼓勵大發BB，幫大發BB換上佢最愛嘅蜘蛛俠服裝，稱「你依家可以好似蜘蛛俠咁爬牆」、「好厲害」，一直畀信心大發BB。大發BB終於再次嘗試，李同國亦一直幫忙拉實條線，最終大發BB成功攀上頂峰，相當厲害。

另外，大發BB嘅媽咪噚日喺Instagram公開囝囝嘅舊照，相中大發BB細個好多，塊面仲係圓嘟嘟，十分可愛，令粉絲大呼懷念，似乎媽咪都唔想囝囝大得咁快。

更多韓流，喺晒《娛果》
http://fb.com/appledailyent