【新增回應】

嚟緊星期日（16日）就係大台頒獎禮，每年呢個時候都係爭餐死，今年叮噹馬頭嘅有《宮心計2深宮計》胡定欣、《BB來了》李佳芯、《宮心計2深宮計》陳煒同《三個女人一個「因」》黃智雯。

今日有雜誌報道指定欣對自己慳住使，對父母就疏爽以1,100萬買豪宅俾佢哋住。報道又指，原來胡定欣太爺開始做海味店，家族曾經風光，不過世道艱難，最後關門大吉。唔知佢係咪冇晒心機，定欣今日凌晨更新ig，露口風似乎想不問世事。

定欣先喺ig story度講「那甚麼是生活」，佢話：「常常說追求生活，那甚麼是生活，生活的意義，應該如何生活，大家都是用生命換生活！」、「每當聽到身邊有認識的人，身體健康出現問題，都會令我反思自己的生活，甚麼才是最重要，怎樣可以取得平衡。」

迷惘咗一輪，定欣喺好兄弟口中搵到答案：「有位好兄弟講咗一句說話，『針無兩頭利』，無人唔識呢句說話，亦聽過無數次，但今日我聽到突然叮一聲，好似解開一直而（以）來對人生追求美的諗法。」、「對，針係無兩頭利，世事更加沒有完美，做人不能貪心，不會每件事都如你所願，只要盡我能力，做我可以做到的就足夠。」雖然唔係咩大道理，但佢話要做到一啲都唔易。

至於另一位視后大熱李佳芯，有周刊指佢原本係坐定粒六封后，點知佢唔想再做媽媽角色，突然反口推劇，令到原本喺年尾開拍嘅《禍後》打亂陣腳，得寵變失寵，白白將視后呢個獎送咗畀人。而呢套劇嘅女主角就由黃翠如執二攤，同林文龍拍住上，報道指，剛轉會到星夢嘅連詩雅都會登場。

既然定欣無心爭獎，李佳芯推劇出事，自然就益晒過檔後聽聽話話嘅陳煒同原本已經有大馬同新加坡女主角兩個座喺手嘅黃智雯。

另外，今晚Ali喺將軍澳出席活動，講到佢因為推劇而失寵嘅事，佢話：「如果係就等拎獎先推，我係因為健康出咗問題，臉同下巴都有好多點點，醫生話係情緒同壓力影響免疫力，搞到內分泌失調，仲話我個腎都唔係咁好，中醫叫我放鬆啲！」

精選娛聞，喺晒《娛果》
http://fb.com/appledailyent