今季進行了18場賽事，有13個馬房已經贏馬，其中徐雨石、沈集成及呂健威都是佈強陣之下，成功開齋兼起孖。尚未開齋的練馬師葉楚航，今期出馬八匹，其中第一場「大富大貴」近期辣操而有進步，有力為練者打響今季勝鼓。

第一場四班1200米：上季新馬「大富大貴」插班只跑過兩仗，都是全程在後跟跑，最終尾疊而回，旨在寓賽於操，真正實力仲未揭開底牌，上季敗績未能作準。

「大富大貴」在外地曾經試過三次閘，分別跑第四、第三及第一名，名次拾級而上，但末段衝刺時總是內閃，走勢不規矩。今季開操後已經快跳了12課，8月18日試泥閘，出閘後應聲彈出，直路按實亦自動湧前，表現充滿新鮮感，而且流露旺盛的競賽意慾，狀態進展三級跳，近兩星期連續拍跳五課，動態相當積極，今仗可見真章。

最強對手是「歐洲巨星」，上場雖然只是贏五班賽，但贏馬姿態有餘未盡，四歲質新馬表現開竅，升班而只孭118磅，三甲穩陣。「銀城福星」三勝同程路有專長，今仗最後試跑落草地快跳，造出22秒2快時間，露搏殺手影。「萬事欣」前速夠快，可爭配腳。