九西補選建制派人選未定，最近突然傳出若然前食衞局局長高永文若果唔去馬，佢嘅前政治助理陳凱欣或有機會接棒上馬，消息「震動」政界，O嘴一個接一個，與此同時，建制派本周六喺九西各區搞街站，雖然關乎地方衞生，但有人話真命天子此中尋。

咁啱得咁橋呢，新民黨主席葉劉淑儀喺facebook透露，高永文其實喺上屆離開政府無耐後，已經答應出任新民黨顧問，但因為問責官員要「過冷河」，延至上月先落實，加上醫務所業務繁忙，所以未能一如保安局前局長黎棟國、消防處前處長林振敏等，親身到新民黨總部攞委任狀兼影相留念。佢話知道高醫生貴人事忙，如果佢肯抽空參與政黨工作，自己一早邀請佢加入新民黨做副主席啦；而家獲對方答應擔任顧問，對新民黨嚟講都深慶得人。

點知講完民望高，葉劉就話鋒一轉，話曾任民望高政助嘅陳凱欣(Rebecca)處事勤奮，為人積極又有親和力，希望佢可以秉承民望高熱心服務香港嘅精神，為社會作出更多貢獻，喺更大層面服務市民：「假如她願意進一步服務香港，為民請命，我必定鼎力相助，全力支持。」咁嘅時機下意有所指，似乎葉劉都力撐，陳凱欣代建制出戰補選噃！