愛華頓季前使咗成1.4億鎊（約15億港元）增兵，雖然就話有賣走盧卡古嗰度一大舊錢，但而家英超只得1勝1和3負嘅成績，連埋歐霸盃直情直落輸4場失12球，仲要1球都入唔到。季前被視為其中一個帥位最穩嘅領隊朗奴高文，而家都聞到魷魚香，根據英國各大博彩公司開出嘅「誰是下位離隊領隊」的盤口，朗奴高文已經成為次熱，直情直逼近個幾星期幫韋斯咸搶到4分嘅大熱門比歷。

以《威廉希爾》嘅盤口為例，下位被炒仁兄嘅賠率之中，朗奴高文係3.5倍次熱，而比歷就係2.87倍嘅大熱，差距已經越來越窄。值得一提嘅係，第3熱門嘅紐卡素領隊賓尼迪斯，已經去到13倍，睇嚟下個落鑊者，真係好似唔係比歷就係朗奴高文咁。