韓君婷舊年已開始轉型到藥廠做OL，今日幫公司喺尖沙嘴主持活動，仲邀請到江美儀出席，韓君婷話好享受o依家呢份工：「可以一邊讀書一邊做嘢，讀嘅都係相關醫學美容嘅嘢。」

韓君婷又透露有留意最近嘅港姐面試：「咁啱公司嚟緊11月都會舉行一個選舉，招募21歲以上嘅女仔尋找黃金比例。但要求同港姐有啲唔同，港姐係要求美貌與智慧，但我哋公司淨係想搵面部嘅黃金比例。」

韓君婷話要求參加嘅女仔喺過去6個月冇做過任何醫學美容，嚟緊11月就會喺泰國舉行「選美」，問到咁整過容嘅女仔得唔得？佢話：「唔得，任何整容同做過入侵性嘅手術都係唔得。」咁勝出嘅女仔有啲咩獎項？係咪佢所屬嘅公司包一世免費做醫學美容？韓君婷話：「唔係，只不過係等佢認識多啲自己身體同面部比例。」

而江美儀就話自己都親身試過韓君婷公司嘅服務：「你知道我年紀都唔細，今年都46歲，有時做藝人都要保養吓。」佢話自己崇尚自然，全身都係純天然：「一般醫學美容可以，但其他嘢好似打啲膠入塊面就接受唔到，我係一個演員，如果打到塊面硬晒冇表情咁點得。」