關楚耀（Kelvin）上年被踢爆同來自韓國、影過唔少性感內衣相嘅索模Miu Kim拍拖，仲喺踏入2016年嗰刻，相約喺中環倒數，啜住過年，之後Kelvin亦冇將戀情收收埋埋，大方同女友拍拖四圍去，不過據知Miu Kim唔係全部時間留喺香港，所以每次返嚟香港，一對熱戀中嘅戀人都會爭取時間見面。

食完串燒逛超市

前日先俾記者撞到陪女友過生日嘅Kelvin，孖住女友喺銅鑼灣十指緊扣出現，估唔到馮仁昭前晚又喺大坑發現呢對癡纏戀人喎。前晚約8點幾，Kelvin同女友喺大坑一間食pizza嘅舖頭打躉，其間兩人同時叫了啤酒飲，一人一杯嘆住pizza咁傾偈，坐咗一粒鐘先走，然後再去附近一間舖頭食串燒，Kelvin食食吓仲發現記者，不過心情好好嘅佢不但冇嬲嬲豬，仲同記者say hi，食完嘢仲做廿四孝男友同女友逛超級市場，之但係兩人逛咗一大輪，最後只買咗薯仔同菜，整乜嘢？煲湯？我諗只要係女友整，Kelvin食乜都咁開心啦！
撰文：馮仁昭