【灣仔】最美麗港姐朱玲玲同老公羅康瑞結婚多年，依然咁恩愛，不時被拍到拍拖行街。雖然早前朱玲玲榮升做嫲嫲，乖仔霍壠剛同郭晶晶誕下愛情結晶品，不過霍壠剛就踢爆媽咪怕自己力氣唔夠，所以唔敢抱乖孫。

返回淺水灣住所

唔使弄孫為樂，朱玲玲日前捉埋老公陪佢揀靚衫，日前近下晝5點，朱玲玲同羅康瑞去到灣仔華潤大廈間中藝行街，佢哋兩公婆好鬼恩愛，全程有傾有講，朱玲玲亦顯得小鳥依人，上落電梯時蹺實老公手臂。佢哋行到中藝專賣傳統女性服飾嘅位置，當中嘅服飾由幾千至過萬不等，廿四孝老公羅康瑞陪住愛妻購物，其間朱玲玲不時問店員服飾嘅質地同點襯，佢哋逗留咗成45分鐘，最後朱玲玲揀啱心水，二人離開時見到羅康瑞手持一大袋戰利品。

之後玲玲兩公婆就落樓上車，由於當時正值放工時間，所以佢哋個司機見有其他車輛阻住上落車位，都唔顧規矩喺第二條行車線畀朱玲玲佢哋上車，架車之後駛入淺水灣道一間獨立屋。
採訪、攝影：畢紹基、李志明

戲裡戲外，話題最強，立即收睇《動戲場》:
http://hk.movies.nextmedia.com/extra/list/