俗語話，女人撐起半邊天，今日商業社會，大機構高層亦力求陰陽協調，男女均衡。舊年7月接掌做恒生銀行（011）零售一姐嘅關穎嫺（Margaret），即日起內部級別更上一層樓，由原來Band 2升至Band 1，僅次於行政總裁李慧敏（Rose），成為恒生第2最高級嘅女高管。
恒生內部有分不同級別，Band 0至2一定係高層，Rose姐就屬於Band 0。

加入逾20年「一手湊大」

剛升級嘅Margaret有豐富推廣同銷售經驗，1995年加入恒生，至今超過廿載，佢算係由恒生一手湊大、晉升至Band 1級別嘅唯一女高層，因恒生一眾高層女將，無論係現任恒生一姐李慧敏，抑或前任一姐梁高美懿、或已退休嘅中國一姐薛關燕萍，都係從阿媽滙豐過檔恒生。
靚太Margaret閒時熱心義工服務，佢曾經帶領恒生義工隊探訪老人院，送頸巾噓寒問暖。佢舊年接替退休嘅陳力生，擔任恒生零售銀行及財富管理業務主管，之前呢個位嘅內部級別亦屬Band 1。
目前恒生位居Band 1嘅其他高層，包括恒生執董兼大中華業務主管陳國威，同埋另一執董馮孝忠。
升級雖然開心，不過估佢冇薪加，因恒生高層要緊跟阿媽滙控（005）路線，Band 0至3高層，今年繼續凍薪，但紅花可能派得好啩。

李華華
mailto:[email protected]