【坐馬車嚇到O嘴】相葉雅紀大陣仗谷《貴族偵探》千人造勢
武井咲中山美穗相葉雅紀月9貴族偵探
新一季「月9」劇《貴族偵探》喺台場舉行盛大記者會。
富士電視台嘅「月9」檔劇集曾經係收視保證,點知近年富士劇成績每況愈下,而新一季「月9」檔找來嵐成員相葉雅紀擔正演出嘅《貴族偵探》,正好為紀念「月9」招牌已經有30周年歷史,電視台揼本以強勁陣容希望打救收視,據知每集製作費高達1億日圓(約690萬港元),當中佔2000萬日圓(約138萬港元)是眾星酬勞,飾演女僕嘅中山美穗每拍一集至少賺得200萬日圓(約13萬港元)。
《貴族偵探》將於本月17日首播,故事由推理小說改編,講述相葉同武井咲飾演嘅新人偵探一同查案,演員陣容還有中山美穗、井川遙、仲間由紀惠、松重豐等,而富士噚日喺台場舉行盛大記者會,招代大批粉絲到呢個戶外活動造勢,吸引共有千人圍觀。
為配合劇情,主角相葉今次坐馬車登場,不過當隻白馬煞停一刻,就嚇得坐喺車上嘅相葉立即O嘴,而同場仲有拍檔中山美穗、武井咲、井川遙、松重豐、生瀬勝久同埋瀧藤賢一出席,而美穗相隔15年再參演「月9」劇,原來佢已經第7次喺呢檔時段登場,係演出最多「月9」劇嘅女星。