方嘉柏馬房的泥地王「準備就緒」，3月25日勝出二班泥地1650米後，一度轉趨沉寂，直至近兩周開始活躍起來，繼上周二泥地大閘跑第三後，這天(23日)又參加第一組1200米泥閘。由於天氣唔好落大雨，全日四組閘雖照常進行，但合共有17駒縮沙冇到場，然而「準備就緒」卻堅持要試，咁落力催谷趕工夫為乜？
咪為咗7月1日復出，再跑二班泥地1650米囉，嗰場報名上限105分，「準備就緒」現評105分剛好合資格出賽，係佢今季最後一次跑泥地機會，難怪近日要咁認真備戰。
講番呢課閘，「準備就緒」喺潘頓胯下沿途跟前，直路輕鬆趕上，大雨下越走越興奮，摩打腳咁大勝另一當起馬「英明神勇」近九馬位，勁到無倫，可見久休後勇銳依然。4歲的「準備就緒」5戰泥地未逢敵手，泥地王當之無愧，睇怕7月1日之戰，又可以一衝贏晒。