香港好多人有景，但唔少係「禾稈冚珍珠」一族，平時一啲睇唔出，西半山雍慧閣就有一例。
中原黃國明話，日前有個居屋客，由佢哋公司職員陪同，參觀雍慧閣，估唔到睇完之後即刻入市，用約九百九十三萬，買咗個高層B單位，千二呎，呎價約八千二。
個客住新界居屋，係專業自僱人士，因為唔夠地方用，諗住換樓。今次用九成半按揭，利率係優惠利率減二厘七五，還款年期二十年，月供四萬九。
咁佢嘅家庭月入有幾多，可想而知啦。雍慧閣今年十二月入伙。

貝沙歡迎出價周五可成交
盈大首個住宅項目薄扶林貝沙灣，第一期開始收樓入伙。發展商噚日招待傳媒，參觀一期現樓，另外，配合開售南灣第七至九座，售樓處設千四呎新示範單位供參觀。
據知，發展商將會先發售第七座，意向呎價九千，接受出價，到價嘅準買家，喺周五晚「名人之夜」，可以落實交易。
盈大行政總裁李智康話，市場氣氛好，遂提前推售小量單位。該盤其餘分層單位，明年賣價每呎不低於一萬元。佢又話，相信未來樓價每年平均升一成半亦屬合理。
香港置業夏笑笑話，貝沙灣剛剛錄得二手成交，二期一座低層C室，千四呎，以九百八十萬易手，每呎近七千。

栢德豪廷狂加價
即將解封嘅九建九龍城栢德豪廷，入場費九百萬起，比起六月份封盤前，足足貴咗一倍。
點解發展商加得咁瘋狂？九龍建業市務及銷售總經理羅汝榮解釋，因應近期特色單位有市場，今次重售，唔會逐個單位賣，要買就要買相連單位，面積分一千七百同二千呎，平均呎價六千五。
樓盤𠵱家淨番四十零個單位，可做相連戶嘅，大約有二十套，今個禮拜六，率先推售四至八套。
至於兩個豪華裝修嘅示範單位，買家可按樓價，加二百萬連家電買入。