佘詩曼噚晚喺金鐘出席一個雜誌頒獎禮，講到香港電視不獲政府發牌，引起全城關注，阿佘覺得政府要有合理解釋畀市民，認為冇必要隱瞞，要求清晰答案唔係奢侈嘅事，佢又話政府有佢嘅政策同規則，香港如果有多幾個電視台係好事，作為觀眾、行內人都係好。

阿佘有唔少藝人朋友已經離開港視，包括周家怡、麥子樂等等，問阿佘會唔會拉攏佢哋，幫佢哋搵工﹖阿佘話：「我同家怡傾過，佢話未有打算，等件事完咗先算。」佢仲不忘幫無綫話：「返無綫，絕對歡迎。」講到唔知無綫有冇黑名單﹖阿佘話：「我覺得應該冇，無綫仲好需要人，因為之前有批藝人離開。」講到呢度，阿佘都忍唔住話自己好似無綫企業傳訊部宣傳科副總監曾醒明上身。不過噚晚佘詩曼一身黑到場，未知係咪隔空撐HKTV員工呢?