石詠莉早前大病一場入醫院( 新聞連結： http://bit.ly/2gFrhdd )，出院後短短休養就要為工作奔波，為新歌四出宣傳，噚晚又在家中幾乎暈倒 。

今日石詠莉到商台接受訪問，佢話：「可能之前大病一場未完全痊癒 ，又遇着女性問題，噚晚喺浴室沖涼時感覺到手腳麻痺，意識自己想暈就叫男友，幸好男友鄧健泓及時將我接住抱起咗我落床，好彩在身邊，唔係就變咗條蚯蚓咁唔知點。」問到石詠莉當時情況危急仲趕唔趕得切圍條毛巾？佢笑指你話呢。

石詠莉話男友鄧健泓見狀又驚又擔心，當時自己面青青有又抽蓄，其實早在多年前石詠莉有同樣經歷，當時醫生話可能腦突然缺氧所致。問佢會唔會休息停工養病？石詠莉話：「唔得，唔可以 公司對我支持，好少事，我會(進)補下。」而屋企人就更加擔心，石詠莉笑言：「佢哋問我有冇燒衣紙，我一向冇做開，亦冇特別諗，而且近日幾好，新歌同銷量都好好，好多好事發生，唔好負能量。」