08年對於敏妮嚟講，肯定唔係一個好年份，因為踏入新年不足10日，敏妮接連收到痛心嘅消息，當中有「生離」，更有「死別」。
前晚，打電話畀一個識咗十幾年嘅老朋友，聽電話嘅係佢妹妹，「你好耐冇搵我家姐喇，佢舊年離開咗我哋……」有啲朋友你唔會經常同佢碰面，但喺有需要時，佢無論身處何方，總係會第一時間出現，唔使開聲，大家已經有一種默契，敏妮同呢位老朋友嘅交情就係咁。

講開呢個朋友，佢出身大家族，留學法國，返嚟開咗間公司做飲食相關行業。老朋友有啲藝術家脾氣，對佢喜歡嘅人會瞓身支持，敏妮記得，佢曾經提到好錫佢細佬，因為細佬讀書唔叻，做嘢亦唔出色，喺父母眼中唔係咁得寵，雖然生於大富之家，但只可以搵到份人工唔高嘅工作，生活緊絀。
老朋友錫呢個細佬，係因為細佬雖然唔叻，但好有骨氣，從來唔會開口要人幫，所以老朋友從來唔會現兜兜畀錢佢細佬，但就教佢做生意嘅技巧，諗住幫佢建立事業。據老朋友妹妹講，𠵱家細佬打理姐姐留低嗰間公司。
所謂「長貧難顧」，與其畀飯佢食，不如教佢點樣搵食。敏妮識得好多有仔女嘅基金經理，問佢哋點教仔女理財，佢哋都係話：「我努力搵錢，就係為佢哋累積財富。」

呢個觀念大錯特錯，經歷過股災、金融風暴嘅人，就知道財富可以一夜間化為烏有，惟有獲得財富嘅智慧，可以跟隨一生。所以新嘅一年，敏妮已經報讀咗兩個專業課程，為自己增值。

http://wanmanli.com/blogs/