【愛妻號】房價每晚3千元!哈林揀「昆凌款」月子中心
庾澄慶哈林張嘉欣
「哈林」庾澄慶上年同主播張嘉欣再婚,主播妻好快就陀B,計一計,呢兩個月BB就出世,一向係愛妻號嘅哈林,不僅生活上細心照顧,仲為老婆揀咗一間高檔嘅月子中心,據知呢間月子中心,之前周杰倫太太昆凌生完囡囡「小周周」都係喺呢間月子中心調養。
據台灣報道指,哈林前妻伊能靜生囝囝小哈利時,遠赴美國生B,而哈林現任太太張嘉欣由於係高齡產婦,陀B後不適嘅情況較嚴重,所以留咗喺台灣待產,有傳張嘉欣希望去中山醫院生B,不過哈林家人想佢去台大醫院生,由「神之手」名醫李建南接生,產後就住位於金山南路同濟南路口嘅月子中心。
呢間月子中心設施豪華,門禁森嚴,僅有25個房間,每房有專屬車位,家屬要戴一個特殊手環,停車後得掃描手環才能入內,並靠手環感應啟動電梯,每層有護理站、護士、保安員透過螢幕監控,隱密度高,每間房有按摩椅、空氣清淨機等,除咗一日三餐,菜單每周換,又會派3次點心,據悉約400呎高級貴賓房嘅房價每日要俾3400港元。