甲一首戰已爆冷輸波嘅飛鷹,噚晚喺灣仔修頓室內場大戰福建,開局唔錯兼博到福建主力鄭錦興個犯纏身,早段已退居板凳。不過,飛鷹射手蘇伊俊頻頻射失罰球,錯過拉開比分嘅機會,半場只可以同對手打成30:30平手。好彩飛鷹喺最後一節,乘福建阿興「拗柴」被換離場,加上陳耀祖攻入全場最高18分,終於以70:62贏波,成功拉埋福建落水,保住前四機會。至於打頭陣嘅晉龍(下圖),就以77:65贏安青開齋。
另外,根據籃總消息指,下禮拜一喺新伊館上演由南華對永倫嘅銀牌決賽波飛,已經賣咗九成半,想睇波就快啲去城市電腦售票網撲飛喇!