金管局上月底再收緊按揭成數，七百萬樓下只准造六成，上車仲難過政改開綠燈。不過，你有張良計，我有過牆梯，香港人出名轉數快，既然銀行閂水喉，可以轉向財仔埋手，一樣搞掂。搵概念股炒，靄華（1319）乃不二之選！
點解咁堅定，三個原因逐個數！第一，按揭勁。中期業績顯示，按揭抵押貸款總額達3.4億，勁增72%，順利壓過典當貸款成為公司主業，淨息差更由13.5%擴闊至16.1%，有升有息也。睇真啲，期內有過百宗新造按揭貸款生意，壞賬紀錄係零，證明客戶質優，長做長有。第二，估值平。早前發盈喜，全年盈利起碼增八成，市盈率將降至十二倍，同業第一信用（8215）及環球信貸（1669）市盈率分別為二十一及五十三倍，靄華平足幾條街。第三，零蟹貨。從圖表出發，靄華大成交破位，再創上市新高，上面阻力冇晒，唔貪心，用十五倍市盈率做目標，上升空間25%，屆時都未有耐追到同業估值。