領頭羊蔡約翰目前在練馬師榜領先第二位沈集成九場頭馬，淨計雷神回歸做主帥開始，個半月時間累積21場頭馬，整個馬房新舊馬演出都比季初脫胎換骨。今戰（22日）第二場「神州威龍」大馬排外檔仲好，是開齋黃金機會。

第二場四班1000米：預計快馬會有「威先生」、「陽明滿滿」、「阿凡達」、「永旺喜喜」，後三駒排8至10檔，相對排12檔的「神州威龍」很大機會可楔入三、四位。

「神州威龍」高頭大馬，出閘頭幾步未必最快，但當撻着走順後，三兩箭步便可跟上步速，排大外檔（12檔）着數之處，就是可以避免因出閘唔夠快而被閂擋跑線，反而在外疊大步走，就算前段不夠快，跑順100米後便可壓入二疊，對呢類翻步大之馬最有幫助。

「神州威龍」與主要對手「陽明滿滿」跑法相同，以雷神機智相信會乘機楔入，再加上受讓14磅，點計都秤高多少。

最後試跑專登搵肌肉發達的騎馬人代試，見他屈膝撐到行，過終點後稍放鬆即一支箭走甩，狀態歷來最勇，若因12檔換來賠率，更加要留意。