【周杰倫紅館個唱】十五分鐘賣晒!絕望座位表開電筒都唔掂!
紅館周杰倫地表最強
周杰倫2018《地表最強2》世界巡迴演唱會-香港站,明年3月15至19日及21日紅館舉行,總共6場。票價分HK$1,180/HK$780/HK$480,今早開售。
噢,sorry,唔記得咗,唔好意思,係唔關香港人事0架。
今朝10點,各大通利琴行正式公開發售門票,而每位排隊人仕限買4張。喺尖沙嘴通利琴行外,開售前已前有三十多人排隊,一如以往,排頭位仍是南亞裔人仕,係,一如以往,都係絕望座位表,因為大約只有五分一座位公開發售。
正式開賣約五分鐘左右,排隊頭約七八位南亞裔人士已經成功買到飛,隨後有位手執摺凳嘅中國籍男子同時拎住四張飛,拒絕受訪。之後再有一個男仔唐先生,估佢係fans啦,兩手空空咁,佢話:「買唔到呀,本來想買$1,180,依家只係買到$780。」咁都總算係買到吖!
問唐先生幾點鐘嚟到排?原來佢非常有部署,有晒planning:「屋企人幫我排先,七點幾開始排。」佢話鍾意咗周杰倫好耐,成功買飛嘅戰績真係不堪回憶——嗰次就係用四千幾蚊買黃牛,坐第三行。咁今次唔使買黃牛,算唔算係成功?唐先生苦笑:「都算係。」
到10點25分左右,又有個男仔準備走,問佢買唔買到飛啦,佢話喺上面逗留咗十分鐘,通利嘅職員同佢講已經冇晒飛喇,咁點解佢唔走?「想博下睇下有冇人彈番啲飛出嚟唔要吖嘛。不過都冇反應。」
現場仍有二十多人等緊,通利琴行職員就落嚟同佢哋講,話俾佢哋分批每人上去五分鐘,由職員幫佢哋撳電腦睇下有冇飛彈番出嚟。
重點係……大家聞言都冇咩反應,因為大家都預咗根本買唔到!
一如以往,「頭香」都係南亞裔人士。 (採訪、攝影:馬建華)