有邊個女人唔貪靚㗎？就算係工作狂、星期日都經常喺特首辦打躉嘅林鄭月娥，一樣姿整！噚日發表首份處女作嘅林鄭，着咗最愛嘅旗袍亮相，而且朝早同中午大變身，朝早出席立法會着嘅旗袍係淺金色，晏晝去記者會時則換上藍白衣，雖然米白色外套冇變，但為咗完完整整嘅total look，所以佢同時係換埋高踭鞋㗎，朝早時着米白色，下午已經改着黑色，對衣着配搭都一絲不苟，對工作嘞喎，當然有更高要求。去到夜晚嘅傳媒電子論壇，林鄭又換衫，今次連外套都換埋，深色上陣嘅佢戴咗珍珠頸鏈，好鬼搶鏡。

齊打藍呔撐報告

既然係林鄭處女作，「第一先生」林兆波當然要捧場，只見佢都以深藍色西裝現身公眾席，聽太太宣佈首份大作，可能因為林鄭打破慣例，唔讀全文只讀撮要，不足一粒鐘搞掂，令席上嘅第一先生全程眼睩睩好精靈冇瞌眼瞓，證明林鄭呢個策略好成功。林兆波離開時冇回應記者提問，唔知佢畀太太幾多分？
既然喺波士推出心血結晶之日，做細嘅點可以唔做啲嘢聊表心意？天藍色嘅施政報告封面，係咩意思大家心照，唔少司局長，全部打晒藍呔出場，好似政務司司長張建宗、財政司司長陳茂波以及運房局局長陳帆等，以不同深淺度嘅藍呔上陣。若覺男藍班未夠耀眼，不妨留意吓女子組，新民黨主席葉劉淑儀同黨友容海恩，孖住以紫藍色外套登場，以行動支持女特首。

李八方