面對樓市放緩，美國銀行界千方百計搶樓按生意，有銀行最近更推出「零收費房屋貸款」，可知競爭幾咁激烈。喺《MSN討論區》，網友blackhorse問：「要借錢買樓，究竟向銀行還是按揭公司貸款着數啲？聽聞銀行嘅利息未必係最平，究竟係真唔係？」
JoeBanker教路：「銀行嘅樓按利息通常高過按揭公司，但勝在明碼實價，冇咁多蠱惑招數。如果地產經紀向客戶推介按揭經紀，就千萬要小心，因為地產經紀通常推介旗下嘅按揭公司畀顧客，萬一撞着個缺德嘅按揭經紀，咁樣仲衰過搵着間最差嘅銀行。」所以佢列咗幾項幫襯按揭經紀前要注意嘅事項：
1.同家人或朋友磋商；
2.預先格價；
3.向按揭經紀索取供樓利息表，以免經紀日後反口；
4.細閱估價單，發覺唔對路就要出聲；
5.貸款正式簽字前，客戶應向貸款機構索取「過戶費用表」（HUD-1），並詳細閱讀，若發現有問題就要問清楚。