張武孝（大AL）除咗演藝事業，近年更愛上跑步，佢話自己開始長跑嘅原因，係因為要報答恩師黃霑。

大AL語帶唏噓表示：「霑哥作咗好多歌畀我，印象最深嘅，好似《鬼叫你窮》、《隋唐風雲》、《發你個財財》，喺歌唱事業幫我好多忙，私底下亦係好朋友，亦師亦友。」

「佢過身時（編按：黃霑於2004年因肺癌病逝）非常之難過，嗰時諗『霑哥有乜可以報答你呢？』，記得佢臨去之時，曾經係電視度，叫人唔好食煙，嗰時我都有食煙，所以立定決心戒煙。」

唔食煙有咩做？大AL諗到要做番啲運動，最廉價當然係跑步，從嗰時開始跑。佢話10年前一個禮拜跑2至3晚，每次都跑10公里：「我住大圍，喺屋企沿城門河跑去第一城，再跑返屋企，就10公里。不過近年醫生朋友話跑少啲，年紀大會傷腳，所以縮短路程，跑5至7公里，通常都係夜晚跑。」

一戒到o依家，已經13年，戒煙帶俾大AL嘅唔止係健康，連佢把招牌「豆沙喉」都清埋，佢話沙聲係因為早年每晚喺夜店唱完歌，放工仲要去蒲，大AL話：「一日唱3個鐘，唔識唱都變識唱。年青人百厭消夜、古靈精怪，把聲咪沙咗，戒咗煙把聲係清咗。」

見到大AL發達嘅小腿，一睇就知係戰鬥格，讀書時佢話經常喺運動場被叫名（攞獎），佢話：「發達係先天，中學乜嘢都玩100米、接力、跳高、跳遠，嗰時冇乜正統訓練。」

精選娛聞，喺晒《娛果》
http://fb.com/appledailyent