《我的少女時代》嘅宋芸樺同劉以豪早前合作一套校園片《帶我去月球》，戲名係來自已故台灣歌手張雨生嘅同名歌曲。佢哋接受訪問時先以半鹹不淡廣東話介紹自己，劉以豪就將自己個名諗成「扭耳豪」，要身邊嘅宋芸樺幫手改正。現年25歲嘅宋芸樺似乎已成為「女學生專業戶」，佢話：「也蠻開心，因為自從第一部《等一個人咖啡》到現在已經4年，希望再過4年也可以再演學生。」佢話中間其實都演過唔少角色好似上班族、動作片，雖然每一次每一個角色都喜歡，不過都係偏心演學生：「但演學生大家拍起來感情會好，都玩樂在一起，很好玩。」

劉以豪今次係第二次擔任主角，但希望呢部係最後一部學生片，佢好爽朗咁話：「因為我已經31歲，我覺得演起來蠻不容易。有跟導演討論應該怎樣回到17歲，青春洋逸。」佢自爆喺戲中個演學生嘅演員中年紀最大，宋芸樺係年紀最細。估唔到今次宋芸樺仲畀咗個銀幕初吻劉以豪，宋芸樺話一開始有啲嬲：「他的動作太慢，等太久，不過我還是自在放鬆。」反而男方就話成日捉唔到個節奏，所以總共NG咗差唔多10次。佢又講到第一次拖女仔手嘅傻事：「我問當時女朋友『我可以牽你的手嗎？』女生就反白眼，我竟然問這問題。」

佢又自爆自國中之後跟當時同學成立咗一個「陽光宅男」，到現時有啲已經係牙醫，佢哋每次嘅活動都係食早餐同打籃球。宋芸樺就話女生都是喝下午茶，聊一個下午，仲話下次會帶劉以豪去「等一個Cafe」嘆茶。

場地：香港九龍貝爾特酒店
採訪:何永寧
攝影:仇志德

更多娛聞，喺晒《娛果》
http://fb.com/appledailyent