搵食艱難，打工仔喺中環搵食更難，中午食晏時間人逼人，想食餐安樂茶飯唔容易，家陣連鏞記都加價，一盒燒鵝飯加3蚊賣38蚊，叉燒飯31蚊加到33蚊，由於選擇有限，中環人都要硬食。
鏞記本月中全面加價，招牌燒鵝一隻加20蚊至460蚊，外賣飯盒同時加價，八方噚日中午到鏞記，見到唔少人等買飯盒。拎住盒燒鵝飯嘅金先生話，雖然鏞記加價，不過喺茶餐廳、快餐店食晏都要幾十蚊，相比之下鏞記唔算貴得離譜，因為「始終要食飯」。陳生則話一盒燒鵝飯加8%幾犀利，日後要忍吓口唔食咁豪。

頂唔順食材成本增

好多人同八方有類似經驗，就係去鏞記買盒普通燒鵝飯，周不時骨多過肉，啱唔啱食睇你口味同埋咀嚼食物嘅耐性，如果捨得，其實啖啖肉雞鵝雙髀飯都係賣152蚊盒，僅加價2蚊，加幅1.3%，難怪甘老闆話加價「好克制」。鏞記頂唔住成本要加價，唔少中環人幫襯嘅外賣老火湯都要上調價錢，開業11年嘅「中國湯」今個月歷史性加價約一成，負責人周慶基話因為食材成本上漲，唔加唔得。
周慶基話創業前估計港人為咗食得健康，會願意花錢飲湯進補，點知近年打工仔反而越食越慳，為咗維皮，佢惟有轉型為酒店同高級餐廳煲湯，唔再倚賴散客生意。03年開業嘅「靚湯工房」，亦係以老火靚湯招徠，主打午市外賣生意，過去每份套餐，即一客湯連飯，賣46蚊，3月初開始加價，雞扒、豬扒套餐要加2蚊，半隻燒春雞套餐更要加5蚊，負責人戴先生話食材成本上漲幅度好大，「我哋只係按個別菜式咁加，希望客人可以接受」。

金融海嘯客源萎縮

戴先生又話，過去外賣定單遍佈港、九、新界嘅寫字樓、工廠區，但近年市場越縮越細，某程度反映打工仔收入變化，「以前好多人願意畀46蚊飲靚湯，但係慢慢新界冇咗定單，到08年金融海嘯後，九龍紅磡尖沙嘴都冇埋，家定單主要集中港島寫字樓」。

mailto:[email protected]