無綫製作嘅《梅艷芳，十年回憶音樂會》，前晚播映第一集，有倫永亮﹑張敬軒﹑湯寶如﹑王菀之等大唱阿梅經典金曲。

無綫今次雖然誠意可嘉，藉節目紀念呢位一代歌后，遺憾係節目製作有啲九唔搭八，而最大鑊嘅係，節目內雖有唔少新晉歌手獻唱阿梅金曲致敬，但可惜表現不濟，慘遭電視迷及網民狠批，就連張敬軒同英皇新人許靖韻合唱《芳華絕代》，亦難逃網民一鬧，仲話情願無綫重播阿梅經典MV好過。

而阿梅好友小美都忍唔住喺微博留言： 「沒誠意和害怕一些根本沒接觸過梅姐的人在亂說感受，很矯情。好失望。」

另外，梅姐生前好友倫永亮，噚日獲頒「CASH音樂成就大獎」，講到無綫呢個紀念特輯被狂插嘅演出嘉賓，根本冇乜邊幾個同梅姐熟絡，倫永亮亦話：「我覺得應該搵多啲阿梅識嘅朋友，但見許廷鏗、鄭欣宜同CAllStar唱得幾好，都係欣慰。」