「新城勁爆頒獎禮2018」今晚假灣仔會展舉行，陳奕迅與容祖兒同告缺席，造就泳兒、吳浩康、鄭欣宜、林二汶、鄭融跟張敬軒同坐第一行，甚至連Super Girls都升呢，可以同軒仔平起平坐。

由表演嘉賓蘇永康打頭陣獻唱揭開序幕，一口氣唱出《沒有季節的火花》、《那誰》等金曲，台下歌手都企身拍掌打拍子，幫手搞氣氛，康仔唱完後祝歌手有好成績，祝大家有個愉快2019年。

第一首勁爆歌曲由周柏豪《老少平安》先拔頭籌，着黑色絲絨西裝嘅柏豪表示：「非常開心攞到呢個獎，呢首歌代表自己今年嘅心願，人越大想得到嘅嘢越嚟越簡單，希望身邊人平安快樂。希望大家都有一個開心健康2019年，新年快樂，老少平安。」第二首勁爆歌曲由林二汶嘅《愛情是一種法國甜品》奪得，二汶今晚揀咗一條好女性化嘅墨綠色裙，襯佢個陸軍裝頭。

歐陽靖Mc jin都係今晚頒獎禮嘅嘉賓，呢位Hip Hop Man嚟到當然表演佢擅長嘅Rap啦！Mc jin唱《ABC》仲叫大家起身，現場歌手都好合作，大家都好投入起晒起身，Mc jin就話好記得佢十年前第一次唱呢首歌都係新城活動，地點喺修頓嘅籃球場，當時仲落大雨，音樂一起大家就開始去廁所。之後佢仲用佢自己入行以來嘅經歷用free style Rap咗首歌。

Mc jin今晚除咗表演，新城仲頒咗個「卓越HIP HOP表現」獎畀佢，佢就勉勵新人話：「明白你哋覺得需要畀人知道你哋係邊個，但我覺得唔係，最重要自己知自己係邊個。」而今晚攞「新城勁爆新人」分別係 曾樂彤、洪嘉豪、戴祖儀。

精選娛聞，喺晒《娛果》
http://fb.com/appledailyent