香港潮州商會噚日搞就職典禮，過多幾日就卸任東華主席嘅馬清鏗都有捧場。前高官羅范做唔成東華執行總監已成定局，不過東華可能真係冇咗羅范唔得，馬主席透露打算邀請羅范做中大東華三院社區書院策劃小組成員，雖然係義務性質，但都要政府批准，目前只能靜待消息。

請食飯番

馬清鏗坦言羅范俾人阻住埋位「唔開心梗有」，話會請羅范食飯番佢，聘請前高官橫生枝節，馬清鏗坦言同政府交手幾麻煩。想請羅范加盟嗰個策劃小組，成員包括書院創校校長何文匯，主要工作係將書院兩年制課程轉為四年制。當局早前唔批羅范沾手教育事務，根據同一原則，做小組成員都好值得商榷。既然咁麻煩，羅范不如畀啲耐性，過足三年冷河先搵工啦。
噚日個典禮李超人亦有到場，親自恭賀國學大師饒宗頤獲委任為中央文史研究館館員，超人又捐出兩隻大金牛做晚宴抽獎頭獎獎品。八方眼見兩隻金牛都有手掌咁大，份量似乎唔輕，商會中人猛讚牛氣冲天好意頭喎。