34歲嘅九頭身美少女吳佩慈懷孕九個月，都就快生得，但係總係唔少負面新聞，衝住佢而來。之前已有傳聞，話佢個富商未婚夫紀曉波唔肯同佢結婚。隨著臨盆日子越近，傳聞又起。

今日有周刊報道指，呢位香港融匯資本有限公司CEO、澳門永利酒店股東紀曉波，明知吳佩慈下月就生得，但安頓好吳佩慈一個喺香港安胎之後，就同另一個女明星去咗澳洲度假，結果吳佩慈要獨個兒留喺香港過年。的而且確，近排影親吳佩慈行ifc，都係得佢一個人，未婚夫未有同行。

該報道指，紀曉波貴為CEO，又係澳門永利酒店股東，身邊不乏美女主動投懷，吳佩慈亦只能啞忍。之後男方安排佢來港等生B，又講明唔會喺香港過年，吳佩慈亦不便追問云云。

其實吳佩慈同紀曉波2012年開始拍拖，已多次「被分手」，例如有報道話女方愛買名牌手袋，嚇怕紀曉波云云。去年9月，吳佩慈宣佈懷孕，更表示:「目前就是專心待產，生完還得餵母乳一陣子。我會等到完全瘦身後，可以塞得下漂亮婚紗，我才要嫁。所以婚禮的事以後再說吧。」但亦有說男方已到台灣見埋家長，仲送上十卡鑽戒訂婚。

傳聞一波接一波，呢頭自爆未婚懷孕，話咁快就有傳聞話紀曉波無意迎娶，更有指兩人發生爭執。當時報道更指有人同吳佩慈講：「你要生小孩我給你錢到國外去生，但要結婚不可能。」又指吳佩慈陀嘅係B女，綁唔住紀曉波個心。不過同時亦有報道指，吳佩慈陀B之後，紀曉波成日送鑽石鏈、名牌手袋俾佢討其歡心，之後吳佩慈仲同紀曉波去美國度假兼工作考察，又於微博po相大嗌:「哇！太幸福了！」

查實吳佩慈已經就生得，最重要係好好保重身體，ready隨時生B。傳聞嘅嘢，唔好理咁多。

佩慈，一定要幸福啊!