「我冇『火羅』到。」
「可能嗰個角度好似我伸緊手俾阿古生咁，但係本身係in general咁『Yo!』 ，好開心嘅！」

心算王／神算梓王梓軒，噚晚到尖沙嘴出席香港電影工作者總會春茗，新任演藝人協會會長古天樂被突襲，俾J Arie、王梓軒佢哋捉咗上台，眾人揮晒手好似小fans揮Bom Bom Stick打拍子唱《男朋友》，一臉無奈又好憎唱歌嘅古天樂真係非常無奈，但亦好有風度咁唱咗幾句，超級nice。

本來古天樂再開金口唱歌係樂壇影壇盛事，但一直企喺古仔身邊嘅王梓軒臨完場之前突然派咗粒大花生：畫面見到嘅係佢好興奮咁舉高隻手想同古仔Give me five，但古仔完全冇反應，結果王梓軒只好硬生生把手放低……

今午王梓軒接受《蘋果》訪問，由心算王／神算梓角度，還原事件經過。佢話當時唔係想同古仔hi five，可能角度問題令大家有誤會啦。

「我睇到報道之後都覺得好好笑呀，其實當時大家拍緊拍子揮緊手，可能嗰個角度（指J Arie條片）好似係我伸緊手俾阿古生咁，但係本身係in general咁『Yo!』 ，好開心嘅！但係嗰晚係真係好高興嘅，新一屆嘅演藝人協會，無論會長定理事，我哋嘅士氣都好高昂，好多大嘅project想做。」

「咁所以……冇事嘅！我哋之間係冇矛盾嘅，之後我哋都同古天樂先生講咗唔好意思，無啦啦拉咗佢上台，其實佢事前係唔知道。當時佢喺隔籬房，但我哋一時興起，就搵咗佢，佢都好大方，肯上嚟同我哋玩。我哋度呢個表演嗰陣都係諗住唱俾佢聽，但真係估唔到佢會上台。」

最後王梓軒嘅總結就係：「咁所以……冇『火羅』嘅！大家都好開心！亦都非常感激我哋會長同我哋一齊玩，大家都好開心。」