去年BBC有一則報道，未知大家有冇留意喇。BBC駐北京記者John Sudworth，喺貴陽試咗個「天網」測試——大陸密集式天網監控。John只係俾警方用手機影咗一張相做紀錄，之後John就「潛逃」。沿路已見多部CCTV監測其一舉一動。一路順風「潛逃」到車站，John話咁快已被「拘捕」。成個過程，只係用咗7分鐘。

大陸呢個「天網」，係全球最大型監控系統，將全國1億7千幾部閉路電視link埋一齊，未來三年，仲會加裝多四億部，且內置AI人工智能，幾秒已偵測到市民容貌。而最新嘅「刷臉技術」，一秒可以同時辨認幾萬人。

所以，張學友大陸巡迴演唱會噚日話又意外地拘捕了第八名逃犯，其實，好正常。

被大陸傳媒形容為「逃犯剋星」嘅張學友，其巡迴個唱戰績竟然唔係入座率，而係佢個「面容辨析系統」（用嚟核實觀眾身份），意外地造就公安拘捕通緝犯。有啲通緝犯係想入場睇騷，有啲只係路過，但統統走唔甩。

繼8號完成「逃犯七殺」，張學友又刷新紀錄，喺山東威海站「完成第八殺」。

威海市公安喺官方微博威威豬咁宣佈，噚日下午三點幾，公安喺威海市體育中心部署張學友演唱會執勤時，「智慧感知警務系統」發現一名駕電單車嘅通緝犯經過，梗係即跟啦，話咁易捉到人。據報此人兩年前因涉嫌盜竊被通緝。

不過咁，公安冇講到疑犯當時有冇戴頭盔，如果戴咗頭盔都detect到，咁真係……

厲害了，你的國。