中環係香港金融商業中心，平日男嘅西裝骨骨，女士衣著端莊，但每年一度嘅鼠戰中環慈善活動，就畀老闆同打工仔輕鬆吓。參加者可以穿著創意服飾，以接力賽穿梭中環核心商業區，以八個職場生涯為主題嘅障礙賽，等參加隊伍鬥智鬥力。

鼠戰中環係今年10月15日喺遮打道舉行，賽事隊伍由八名隊員組成，須籌集捐款最少六萬港元。其中鼠王爭霸戰嘅每位高級行政人員，要捐最少2萬港元。5至10歲嘅小朋友就可以參加未來鼠王戰。

活動籌得善款會用嚟資助中港兩地推廣精神健康慈善機構，即日起可以報名，參加表格可到網頁 http://www.CENTRALratrace.com 下載，詳情可瀏覽專頁 http://www.facebook.com/CENTRALratrace 。