香港大學微生物學系系主任、沙士英雄袁國勇破解不少傳染病之謎，搵細菌病毒咁拿手，點知搵接班人卻束手。袁教授做系主任三年又三年，今年夠期交棒，早前開始提名遴選下任系主任，不過無人上轎，竟然要延長提名期。
有教授同八方講，港大規定系主任最多連任一次，做滿六年事必要退下來，按慣例會由系內提名，再交校方高層定奪；但為顯示尊重學術自由，校方對系內提名一般唔會有異議。今次微生物學系啲學者人人禮讓，幾個月提名期都未有人選，八方聽聞醫學院院長李心平都有啲緊張。

管軼埋頭研究

港大微生物學系人數雖然遠不及外科、內科咁多，但人才濟濟，知情人士指論資排輩，「流感先鋒」裴偉士教授夠晒資格做系主任，可惜年屆退休，「禽流感獵人」管軼國際知名，不過愛埋頭研究，未必有興趣做行政工作。
抗藥惡菌專家何栢良則一早表態唔做DepartmentHead，拒絕同袍提名，佢私下稱做系主任除咗要學術了得，亦要有管理同人際技巧，呢份工認真唔易做。尚有一位被游說接棒目標人物，就係新品種病毒專家胡釗逸教授，胡教授年輕有為，出過唔少學術「大紙」，有人形容佢絕對係合適接任系主任嘅人選，之不過家陣係佢搏殺做研究黃金時間，未必想分心兼顧其他工作，因此袁國勇交棒誰人，十分傷神。