已故百變天后梅艷芳03年逝世後,其遺產滙豐信託管理,近日滙豐信託拍賣阿梅嘅最後一批遺物,由非常珍貴嘅第一屆新秀金獎,到貼身物品都有,當中最受爭議嘅,係阿梅嘅內衣褲都要拍賣。
連日嚟,阿梅徒弟譚耀文、舊愛林國斌、生前一班好友曾志偉、苗僑偉等,都發聲話要守護阿梅最後嘅尊嚴,演藝人協會亦商討對策力阻拍賣,甚至考慮夾錢競投番阿梅嘅遺物,梅媽亦呼籲大家唔好搶貴個拍賣價。
新秀金獎座底價原本係1,000元,本報發現噚日一度出價高達11萬元,惟今日突然回落至6萬元,原來今次嘅拍賣規則,可以喺本月22日終止前兩小時取消落價,未知係咪有競投者為尊重阿梅而取消落價。