莊端兒（Xenia）、鄭敬基夫婦、簡淑兒同組合BOP等，噚晚喺又一城出席首映，Xenia有份參演、由林敏驄自導自演嘅賀歲片《如珠如寶》宣傳片噚日出街，Xenia喺片中賣大包，穿上加細碼泳衣非常性感，Xenia話：「仲有啲仲激嘅、好有動感，着住泳衣彈吓彈吓，其實嗰場戲係講緊阿Bob係一隻喪屍，佢好大力咁捉住我隻手，當時我仲係咁叫佢大力啲，因為佢越大力我就越入到戲。」Xenia話戲入面佢叫波波姐，人如其名，問到佢有冇真空演出？佢就話：「唔使，不過阿驄就好體貼咁畀咗件加細碼嘅泳衣我，佢仲笑我跳極都唔甩，真係為大家謀福利。我對今次呢套戲好有信心，搞笑之餘仲賣親情，大家都要珍惜家人。」而Xenia仲話今次係有史以來最激嘅一次，喺浴缸浸咗7個鐘，佢話：「水位好低，搞到好似冇着咁，自己覺得性感ok嘅，搞笑就得，色情就唔好嘞。」

另外，鄭敬基笑言同太太拍拖睇戲過冬至，而一家人已經喺屋企簡單食飯，嚟緊聖誕佢就要去登台，1月又會去馬來西亞工作，鄭敬基話：「去馬來西亞係同當地嘅歌手一齊做一個以哥哥同梅姐做主題嘅音樂會，哥哥係我偶像，我好榮幸，亦都好期待。太太一定會一齊去，因為我哋都好鍾意馬來西亞。」問到佢有興趣喺當地置業？佢就話：「都會去睇吓㗎，當地嘅人對香港藝人好熱情，嗰邊有75%嘅人係講廣東話，太太都好鍾意當地，覺得啲人簡單，嘢食又好味。」

精選娛聞，喺晒《娛果》
http://fb.com/appledailyent