當年今日
關於我們

智取大市:中外運價殘得嚟夠穩健 - 晉佳

蘋果日報 2012/08/08 00:00


上周港股走勢決定中線方向,結果大市升,有利中線向上發展。本周就睇升市能否鞏固,暫時晉佳對後市審慎樂觀。
家陣市場仲係人心惶惶,要買低殘得嚟又死唔去嘅股票,中國外運(598)算係其中一隻,中外運7月由1.30元附近,跌落1蚊樓下,8月開始反彈,噚日上番1.05元。金融海嘯期間,佢跌穿1蚊嘅時間唔夠兩個星期,可見現價已經非常低。
中外運從事航運、物流等多種周邊服務,亦有落手落腳去運嘢,受進出口貿易供需影響大,但油價成本佔比遠低於一般航運股。以舊年分部業績計,海運業務持續錄得虧損3.14億元人民幣,不過,貨運代理、船務代理、倉儲碼碩3分部業務盈利分別有6.75億、2.97億同3.18億元人民幣,抵銷海運業務虧損有餘,其中貨運代理按年升三成,其餘兩分部盈利冇乜點變,睇嚟中外運嘅業績表現平穩,盈利水平冇其他航運股咁波動。
唔計可供出售金融資產公允價值變動,中外運近5年都能夠錄得盈利,09年係近5年最低,每股盈利都有9分(10.9港仙);現價計算,市盈率都唔夠10倍。
事實上,中外運揸住唔少中國國航(753)、東方航空(670)同A股京東方,連埋非上市股權投資,舊年要撇賬6.72億元人民幣,賬面值剩番13.9億元人民幣,今年上半年航空股跌唔少,睇嚟又要撇賬,但今後大撇空間相信有限。如果計埋可供出售金融資產公允價值變動,中外運舊年純利只有1.96億元人民幣,每股盈利4.57分左右,市盈率約18.9倍。
不過,以一隻市賬率只有0.37倍嘅股嚟睇,年年有錢賺,仲要有輕微淨現金約2億元人民幣,點計都係相當平,至於金融海嘯市賬率低位0.29倍,距離現水平都唔遠,應該有承接力。
呢間公司估值低,某程度上因為派息比較孤寒,舊年得3分。不過,股價跌到落嚟,股息率變咗有3.5厘,好似又差唔晒。現價買入,中短線上番去1.30元嘅阻力區,難度唔會太大。呢隻股海嘯後最高只升到2.50元左右,波幅唔大,睇嚟日後要幾何級上升睇怕冇佢份,不過勝在穩陣,適合穩健型投資者。

晉佳
本欄逢周一、三及五刊出