韋斯咸星期一晚會喺英超聯賽對升班馬哈特斯菲爾德，雖然球隊今季頭三場比賽都輸晒要搶分，但為咗迎接今季第一場主場比賽，門將赫特依然好有興致咁自己搞咗叫做「Finders Keepers」嘅搵手套比賽，喺東倫敦放咗五對手套畀球迷去發掘，不過其中四對手套已經畀人搵到，所以赫特亦喺個人社交網頁提醒球迷記得喺當地時間星期一晚8點入場，搵埋最後一對手套出嚟。

赫特今季由曼城外借咗去韋斯咸，到星期一終於有機會第一次喺主場出擊，佢就趁呢個機會搞咗個「Finders Keepers」。赫特話為咗標記今季第一場主場比賽，所以佢整咗個finders keepers比賽，佢將五對手套放咗倫敦球場（London Stadium）到博倫球場（Boleyn Ground）之間嘅地方，佢將線索放上Instagram story，仲叫大家如果搵到手套就hashtag番「finder keepers」，咁佢就會回覆番大家。

第一對手套係收埋喺Stratford嘅韋斯咸紀念品店，第二對喺West Ham park長凳嘅附近，之後喺烏普頓公園地鐵站同舊主場博倫球場嘅世界盃銅像下面，呢四對都已經畀人搵到，但最後一對收喺倫敦球場，星期一入場嘅睇波嘅球迷真係要努力搵吓喇。