第55屆金馬獎噚晚喺台灣舉行，本來每年一度嘅金馬獎都可以算係影壇盛事，但係今屆金馬落幕後一直爭議不斷，原因正正係又關政治事。

今屆金馬獎由台灣導演李安任執委會主席，佢仲邀請咗鞏俐做評審主席，而今屆金馬獎入圍嘅電影更遍及港台中三地，候選影帝影后更首次全部到場，可以話係畀足面李安導演。

不過原本好地地嘅一場盛會，竟然咁都觸動到玻璃心碎，金馬獎去到中段由黃信堯及徐若瑄頒發嘅最佳紀錄片，導演傅榆憑台灣社運紀錄片《我們的青春，在台灣》擊敗傘運紀錄片《傘上：遍地開花》成為最佳紀錄片得主，佢喺台上發表得獎感言時情緒激動，斷斷續續表示：「希望我們的國家可以被當成一個真正獨立的個體來看待，這是我身為一個台灣人最大的願望。」

言論一出，除咗得到台下掌聲之外，更得到大陸官方關注，廣電總局、中宣部以及網信辦即時向各大網站發出緊急通知，稱「因今晚台灣舉行的金馬獎頒獎典禮，出現『台獨』言論，全網即時過濾一切金馬獎相關報導。」

其後張藝謀、涂們、徐崢等大陸電影人上台後都有意無意強調「中國電影」、「中國台灣」等字眼，作為評審主席嘅鞏俐拒絕與李安上台頒獎，令李安尷尬非常。

頒獎禮完結後更有消息指，大陸演員全部收到通知「不得出席金馬相關酒會」，而有份出席金馬獎嘅大陸演員如胡歌、周迅、鄧超、孫儷等更喺微博轉貼共青團嘅「中國一點都不能少」。

到今晨，原定會留台五日嘅胡歌急急腳去到機場離開，面對記者提問胡歌只係講咗一句「很遺憾」，對其他問題一概沉默，而鄧超及孫儷亦雙雙離台，至於周迅原定今日喺台灣出席嘅《如懿傳》宣傳活動更突然取消。