「反黑警司」吳偉漢因受賄57萬元，日前被判囚28個月。他在內地做生意的胞弟吳偉豪，亦被指控5年來嚴重虐待一名男下屬。《蘋果》訪問剛逃出生天的事主及多名人證，均指事主過着奴隸般生活，除遭吳拳打腳踢、威迫剃眼眉、更被迫跳脫衣舞，甚至要他在肚皮紋下「我以后不再吸烟」的屈辱紋身。事主相信吳與黑白兩道相熟，吳曾稱：「我阿哥仲有兩級升做處長（級）」，恐嚇若逃離就找人斬他手腳。確診患抑鬱的事主回想：「佢太多變態嘢，根本記唔晒，已經係（當時）生活一部分。」吳偉豪否認虐待，只承認曾為女同事出頭「冚佢幾巴」。

記者：李啟發 攝影：周子惇

現年49歲的吳偉豪除了在內地經商，近年在中環鴨巴甸街開設畫廊。據知他已離婚，有兩名分別9和14歲子女。吳有5兄弟姐妹，他是四弟，大哥吳偉漢是港島總區刑事總部警司，但因收受賄向兩夜場經營者通風報信，日前被判入獄。

據吳偉豪網上自我簡介，1993年在加拿大拉薩爾設計學院畢業後，曾任職室內設計師，亦在藝術方面發展，他否認虐待指控。（詳見另稿）

散盡父母遺產 投靠警司胞弟
淪為「奴隸」的47歲港人Dennis逃脫後，已向本港警方及內地公安報案指被虐待及恐嚇，並向《蘋果》講述多年來非人生活。他年幼家境富裕，惟中學時父母先後患癌離世，在港沒親戚的他1990年獲逾10萬元遺產，中七畢業後曾打工，但常到內地夜總會「玩女」，後來索性搬到羅湖開時裝店。

惟因經營不善蝕錢，他轉做採購及銷售，生活仍捉襟見肘。2008年，他透過朋友認識在東莞常平做樹脂板生意的吳偉豪，3年後吳找他當銷售員，當時他已沒積蓄，老婆又跟他離婚，「嗰時冇路行，叫有地方住，有嘢食。」於是投靠吳，搬到他在新天美地花園的寓所同住，每月分紅近萬元人民幣。

慢慢變臉 「一發現食煙就搞我」
最初兩年相安無事，後來吳慢慢變臉，常指罵及呼喝他，「開始對我變態，得閒就狂x我，（材料）顏色出現小問題，就一巴一巴摑埋嚟，開始好x暴力，廠入面全部人睇到。」Dennis憶述。

他由分紅變為每月只得3,500元工資，吳一言不合就打他，「公司有舊木材發霉，話我打理得唔好，扣我人工」，吳的私家車自動按鈕壞了，甚至公司養的魚死了，也要罰扣他7千元工資，「佢長期屈我錢，唔畀人工我。」

吳的前生意伙伴鍾先生亦指，Dennis當時無佣金收入，常因小事被吳罰錢或拳打腳踢，例如在廠房吹口哨，甚至吳跟女友分手，亦指女友前一日見過Dennis，不清楚Dennis跟她說過什麼而要罰他，他曾被打致「即場隻眼黑晒」。鍾曾幫忙求情，但吳指Dennis為人有問題，扣工資是幫他儲錢養老。

Dennis說吳命令他每日早午晚三次甚至凌晨，都要幫他按摩半至1小時。鍾亦說見過Dennis在辦公室替只穿內褲的吳按摩，一度以為二人是同性情侶，Dennis才一直被虐仍跟着吳。Dennis又遭吳禁止吸煙，「一發現食煙就搞我」，有次吳聞到他有煙味即掌摑他，更強逼他在肚皮紋下「我以后不再吸烟」紋身，Dennis邊說邊拉起上衣展示紋身，無奈地反問：「正常人會唔會紋吖。」

被迫跳脫衣舞 剃頭髮眼眉
Dennis不時在廠房被迫下跪，吳以玩弄他為樂，有次命令他跳艷舞，「仲要表現到被人x屎忽個樣，拍晒（片）㗎，又間歇拍我裸照，周圍畀佢朋友（睇）。」他多番遭鐵棍或藤條毆打，吳又曾指使同事阿Ken「叫我好似隻狗，鎖住我喺工廠，但同事做唔落手」，才避過一劫，內地同事見到都不敢出聲。

吳曾叫阿Ken拍攝虐打過程，根據《蘋果》所得片段，Dennis被喝罵後遭吳一拳擊向左臉頰，神情呆滯的他不敢反抗。吳擔心Dennis把其暴行宣揚，一直不准他單獨離開常平，又派同事監視他，令他求助無門。

兄差兩級做署長 求離開遭恐嚇
記者多次詢問Dennis為何不離開或求助，他指幾乎身無分文，「唔敢呀嗰時！」因吳在中港兩地黑白兩道都有朋友，「佢話阿哥仲有兩級就升處長（級），之前介紹咗好多國內嘅官同公安畀佢識，又話同上海仔（黑幫猛人）條線好熟，恐嚇斬我手腳。」故他不敢在中港兩地報警。他曾向鍾求救，但當場被毆。

Dennis多次問吳為何虐待他，求吳放他走，吳均稱他欠債未還，「佢話『你所有嘢都係我畀你嘅！底褲都係我嘅！』叫我剝晒衫褲先可以走。」2015年他曾被吳沒收證件和手機後「放走」，流落深圳，風餐露宿兩周，在餐廳吃食客剩下的食物，飢寒交迫，終患上皮膚病。

火機燒手至滿意才放人
吳後來派司機接他回家，問他：「仲敢唔敢走呀？」Dennis當時真心想：「寧願有個地方住，因為流落真係好慘、好肚餓、好凍，時間過得好慢，被你（吳）打都係兩分鐘啫。」其後Dennis繼續被虐打，去年中他受不了，在家中向吳下跪要求離開，「佢叫我用火機燒自己隻手，燒到佢滿意為止。我真係喊到飛哩啡呢，我諗住如果做到，可以脫苦海，博一博吖。」

鍾亦見過Dennis的燒手片段，形容當時「佢喊囉，問可以停手未，話『我頂唔順喇』……睇咗幾秒已經覺得，黐x線㗎。」最終燒了3分鐘吳仍不滿意，也沒放人，「佢覺得我係佢手上嘅玩具，走唔出佢手指罅，佢係五指山，我係孫悟空。」

「坐監都冇被佢虐待咁慘」
今年初，吳的數名港人生意伙伴看不過眼，透過微信私下聯絡Dennis，向他稱吳的勢力非如此強大，其警司兄長亦已被捕。經數月說服，又找機會約他秘密會面，Dennis終趁吳於8月到台灣旅行時逃到深圳。

Dennis形容多年來「夜晚瞓唔著，有時頭好痛」，精神科醫生事後確診他患抑鬱症。曾因帶大麻過關在內地被判囚的他稱：「老實講，坐監都冇被佢虐待咁慘！起碼啲獄友唔會咁打我，有好嘢都一齊食，照顧我。」他覺得吳是「魔鬼」，至今終於逃離。