劉德華因喉嚨發炎，噚晚要腰斬個唱，休息一晚後，個唱主辦機構映藝文化娛樂有限公司就宣佈取消3場(28-30號)演唱會，即係今晚同聽晚都繼續停唱，有望大除夕才有機會重開。

主辦單位就叫拎住呢3日演唱會門票嘅觀眾保留完整門票，將儘快公佈有關後續安排及退票事宜。究竟華仔會唔會加場唱返3場演唱會？就要等大會進一步消息，除咗要睇佢喉嚨發炎病況同體力應付問題，總要睇返紅館檔期，華仔原先20場演唱會由12月15號開到1月3號，之後下一個檔期就係張學友嘅巡迴演唱接力，學友頭場係11號開，正常會喺7號攞場開始搭建舞台。如果華仔身體康復，檔期方面1月4號到6號都可以勉強配合補到，不過還要預計要拆台交返場地都需時，華仔今次個唱舞台製作較之前複雜，佢更係第一個拆咗紅館頂大電視嘅演唱會，所以估計要裝嵌番都相當需時。

精選娛聞，喺晒《娛果》
http://fb.com/appledailyent