韓流天王Rain去年1月同拍拖多年嘅女友金泰希拉埋天窗，二人婚後積極造人，同年10月升呢做父母，金泰希為老公誕下寶貝女。
金泰希同Rain好不溫馨，升呢做父母後都不時出外撐枱腳，享受二人世界。不過日前Rain喺Instagram上載兩張五倫及朱子十悔訓（朱子治家格言）嘅字句，當中因為一句「夫為婦綱」、「夫婦有別」，搞到Rain被轟大男人，視老婆為附屬品，Rain為怕惹是非已刪除兩張照片。

身為老婆嘅金泰希唔知係唔係心痛老公被鬧，所以噚日即上載兩張自拍相，力證自己有工開，Rain唔係大男人到唔畀佢做嘢。而兩張相係金泰希事隔5個月再更新Ig，同時亦係佢生囡囡後首度公開靚樣，當中金泰希就留言話自己正在拍緊廣告，仲要係拍咗好耐嘅時間，佢大呻天氣又突然變冷，叫大家唔好冷親，又透露好快攜新作見大家。

生完B嘅金泰希依然明艷照人，粉絲都留言勁讚，而老公Rain亦罕有地畀咗like老婆。金泰希將於下周四即佢38歲生日當天現身公開活動，亦係佢產後第一次公開露面。

另外，Rain噚日就去咗澳門出席太陽城集團第11周年晚宴，並擔任表演嘉賓，全力搵奶粉錢。

更多韓流，喺晒《娛果》
http://fb.com/appledailyent