經濟地位，同貨幣地位，係兩個層次嘅事。經濟地位，係吸引消費者去買你產品服務嘅能力，呢種能力來自性價比，成本低、同時品質夠好？產品服務多元化？能保持品質穩定度？能夠準時交貨？種種都係一個國家經濟地位嘅來源，短線只關乎一買一賣，長線就關係到合作夥伴、長期供貨、同更長線嘅生產線投資。

論貨幣地位，最短線係作為一買一賣使用單位，同經濟地位比較，可以係長線得多嘅概念，一個國民可以持有自己國家貨幣一生一世，亦可作為不動產計算嘅單位，更長線係國家持有外滙儲備水平、甚至係誇越life span嘅遺產計算單位，貨幣地位係遠比經濟地位更大嘅一件事。

中國，係一個擁有強勁經濟地位嘅國家，至於貨幣地位，卻遠遠及不上經濟地位相若嘅美國，大家信歐元、日圓，都多過人民幣。大家對人民幣嘅信任程度，來自一買一賣，而中國作為全球最大內需市場，投資者最長線係想同中國建立合作夥伴關係，而你係從來冇乜聽過有外國人買中國資產作退休、資產傳承之用。

正正因為中國人治凌駕法治，大家看在眼內。大家知道去到某個有法治嘅國家，如何為之奉公守法，但中國把尺又鬆又緊，外資永遠唔知自己幾時唔夠舐共，令你嘅人身安全同資產受威脅，國泰（293）就係一個典型例子。一黨專政之下有唔同派系，作為中國有錢佬亦唔知自己靠山玩到幾耐，啲錢流出中國、變做美元，先係自己嘅錢。於是中國只係有經濟地位，而缺乏鞏固嘅貨幣地位，近期更加係行倒車。

中國點樣先會有領先嘅貨幣地位，難矣，一個靠人治去建立嘅體系，走上不歸路，近年仲要引入人面識別、社會信用評分，評分欠透明度，進一步遠離提升貨幣地位嘅路。如果AI、大數據能夠令中國經濟更富強就還頂得住，除非他朝中國經濟地位勁到遠遠拋離美國、歐元區，否則外國人長遠只信你嘅經濟地位，唔係信你貨幣地位，如果連經濟地位都動搖，就冇信任可言。

晉佳
https://www.facebook.com/advanceguy1

基金資料大集合 一書幫你贏盡強積金
點擊即睇《贏盡強積金》電子書