前晚花旗股市造好，港股昨日避過一劫，恒指高開之後再升多100點，不過國內股市冇開，人行係咪呢幾日加息又唔知，股民都好小心，冇大舉追貨，結果恒指慢慢跌番落嚟，收市保住69點升幅。
滙控（005）果然係港股嘅重心，就算𠵱家佔恒指比重細咗，但係要頂住個市，好多時仲係要靠佢，昨日嘅升幅雖然只有0.76巴仙，但係已經畀咗個市好大支持，睇嚟好友今日仲會托住隻滙控。
國內股市假期，香港啲H股都靜咗，圖表唔係好靚，但係炒家都好努力咁摷啲股票嚟炒，內地媒體概念股就有唔錯嘅表現。第一視頻（082）同四通（409）走勢好靚，可惜冇輪炒，都係要留意番啲想郁又有輪炒嘅股票。

中煤C輪7802：中煤（1898）4月中開始喺高位回落，唔經唔覺前日已經跌到條50日線，個個位有好多買盤，禮拜一就出現咗個「錘頭」，昨日再喺50日線樓上整多個「十字星」，應該係反彈嘅時候，可以諗吓隻中煤C輪7802。昨收52仙，槓桿率15倍（有效5.8倍），對沖值0.39，正股升上8.16元同8.40元，7802會喺66仙同78仙樓上，正股跌穿7.50元止蝕。