陳慧琳同張智霖今日喺銅鑼灣出席美心月餅活動，原本Kelly相約幾個家庭喺中秋節露營，但因天雨關係同近日有登革熱個案，Kelly決定取消：「唯有自己一家人喺客廳露營，大仔試過露營，細仔就未試過，只要熄咗Wifi，就好似露營，專心賞月。」兩個仔已開學，Kelly幫手睇功課，對於謝安琪仲同11歲囝囝沖涼，兼灌輸性教育：「我唔會同佢哋沖涼，佢哋自己沖，依家我著住長tee恤短褲，大仔已經遮眼大叫，我要解釋有著褲。但佢自己就會剝晒衫褲喺度跑。依家佢對性方面未好奇，到好奇時由佢Daddy講，佢哋乜都傾，唔會尷尬。」

而張智霖父母從澳洲回港，會首次三代同堂過中秋，活動上佢兩手各抱起一個小孩，但就話唔會追個女：「唔使，玩人哋嗰啲好，依家阿仔11歲，等佢18歲後生個孫俾我湊，永遠有個10歲以下嘅小朋友喺身邊會好幸福同有活力，但阿仔一定唔肯。」問佢係唔係想做年輕爺爺，他笑言自己到時50幾歲，人哋會以為佢係阿孫哥哥。而早前佢完成眼部手術，佢指現時看東西很清晰，被問看到太太袁詠儀更美，佢講笑話：「依家先知佢咁靚，依家係靚靚靚，佢過兩日生日，就送呢個做禮物。」

精選娛聞，喺晒《娛果》
http://fb.com/appledailyent