政改諮詢其實係鳥籠內諮詢，諮詢文件第37至41頁列出12條問題，市民有興趣回應的話，將問題當作作文題目，答完寄回「政制及內地事務局」或電郵至[email protected]就得。呢啲問題包括（一）提名委員會的人數和組成（又細分成五條問題），（二）提名委員會的選民基礎，（三）提名委員會的產生辦法，（四）提名委員會提名行政長官候選人的程序，（五）普選行政長官的投票安排（內分六條問題），（六）任命行政長官的程序與本地立法的銜接。以上係關於2017特首普選，至於2016年立法會產生辦法，另有三大問題：（一）立法會的議席和組成，（二）功能界別的組成和選民基礎（嗱，不是問你應否撤銷功能組別），（三）分區直選的選區數目和每個選區的議席數目。
上述所有題目都受限制於基本法，完全不涉及泛民以前提出嘅建議，假如依照呢個範圍作回應，即是變相接受李飛、中聯辦所訂下嘅規則，假如市民回應時不依照上述範圍，反而提出公民提名之類，林鄭、袁國強、譚志源三人是否會將呢啲信件/電郵置諸不理，好似考試時考生作文「文不對題」咁樣處理？咁樣嘅諮詢，其實相當容易做啫。
講來講去，特區政府當事人有恃無恐，向泛民擺出一副態度，假如不接納「鳥籠」（規定有提名委員會，不提其他提名方法），大家拉倒，2017沒有特首普選，繼續使用2012年選舉方法，跟住2020年也沒有立法會全面普選，睇吓泛民蝕底吖還是建制派蝕底！難道泛民（包括激進派在內）膽敢搞曼谷式佔領中環？雙方談判無希望，大玩brinkmanship，有排煩了。
梁振英今日中午會到四季酒店出席「香港經濟峰會2014」，發表午餐演講，目前不知講甚麼，會唔會乘機向出席人士（幾乎全部是商界財金界精英）講政改諮詢呀？呢個峰會由新城、信報主辦，港交所、恒基、滙豐大力支持，過往曾蔭權幾鍾意出席演講，去年梁振英唔去，由曾俊華致辭，今年梁振英願意到場，應該有嘢講啩？