「佢哋只係拎少少錢出來，拎少少時間，炒起個樓市就不停喺度賺大錢，咁叫公平咩？你出去問吓人，是但問一個人，問吓佢哋想要啲乜嘢。佢哋答案好簡單，只係想要一間好普通好普通嘅樓。點解佢哋要用成世人嘅時間去供一層樓呀？因為啲有錢佬喺度玩嘢呀！越有錢就越有得玩呀！呢個世界公平咩？呢個世界公平咩！」
呢段對白係唔係好熟呢？係出自無綫10年前嘅高收視劇集《創世紀》，由陳錦鴻飾演嘅許文彪講嘅。佢完全道出咗家陣香港無數小業主嘅心聲，所以正值呢段樓價狂升嘅時候，有網民即刻將條片上載喺YouTube，借舊片諷時弊。前日朝流傳出嚟，facebook同各大討論區即刻俾人推爆，個個都讚許文彪講得好。
CCTVB確係名不虛傳，呢條《許文彪，講得好！》嘅短片只係流傳咗一日咁大把，YouTube就應無綫申訴，極速刪除咗。網民好嬲，CCTVB竟然連一啲洩憤嘅空間都唔留畀佢哋，紛紛上網聲討。有網友猜測，一定有人報寸，同CCTVB投訴。
八方思疑，CCTVB設有一支維和部隊，以網特身份出巡各大主要網站，專門消除任何不利社會穩定嘅因素，否則點會高效能成咁。無綫外事部曾醒明話，要求YouTube刪除片段，純粹出於版權維護，班網民諗多咗啫，不過河蟹網特出手之快，曾生都好愕然咁話。