ViuTV舊年推出由邵仲衡、尹揚明、車保羅、蔣祖曼等主演嘅懸疑驚慄劇《詭探》硬撼大台嘅外購劇，劇集以本土都市傳說例如西貢結界等為主題，結果反應相當唔錯，雖然個結局算唔算完美就真係見仁見智，不過劇集埋尾有最少四大伏筆，包括車保羅枉死沉冤未雪、蔣祖曼大叫「我要學茅山！」、邵仲衡被通緝著草、同埋邵仲衡囝囝嘅去向，所以唔少觀眾都期待緊佢哋再開拍第二輯。

日前ViuTV公佈咗第二輯嘅消息，就係拍番主角後生版嘅《詭探前傳》，由游學修（三師弟）、麥子樂（大師兄）及陳安立（大師兄）三位年輕演員飾演茅山三兄弟，今次劇情繼續係以靈異故事為主線，講述三個後生仔點跟茅山師傅學藝。

講到明係三個後生仔學茅山，冇師傅又點成事呢？今日ViuTV喺官方FB到畀咗個難題大家，圖中有四位資深嘅香港男演員，分別係鄭少秋、劉松仁、四哥謝賢同徐錦江，仲話今次「茅山大師傅」呢個角色會由四位當中嘅一位飾演，而大多數網民都覺得徐錦江嘅機會最大。

不過據了解，徐錦江機會最微，因為佢近年主攻大陸巿場，雖遇有合適劇本或工作都唔介意返香港，但係佢最近忙於籌備安徽美術館開幕事宜，分身乏術，接劇機會一半一半。

而四哥謝賢則忙於享樂人生，唔使為搵食而工作，接劇只為興趣，機會70%，剩低嘅劉松仁同秋官，兩位前輩近年戲癮仲好大，所以兩人都係理想人選，不過近年松哥同大台合作無間，要佢投向ViuTV懷抱，相信要有一定嘅條件吸引，松哥接拍機會有80%。

最後嘅秋官目前仍然係自由身，雖然同大台關係唔錯，不過秋官十分潮爆，亦樂於試新嘢，唔排除會豁出去玩返轉，估佢接拍機會有85%，之不過到底係邊個就要等官方喺6月20號公佈至知喇。（LINK在此: https://goo.gl/pNTX7s ）

精選娛聞，喺晒《娛果》
http://fb.com/appledailyent