當年今日
關於我們

  四大俊男高官表現忍淚內功 - 李八方

蘋果日報 2003/10/03 00:00


沙士報告書出籠,果然不出全港眼睛雪亮嘅市民所料,阿董一如既往,貫徹「三冇政策」:無人負責,無人有錯,因此,亦都冇人炒魷辭職。

直迫奧斯卡
咁就成三百條人命,咁就三個月恐懼。到頭來,香港人得到嘅係乜嘢?就係醫務衞生界四大中年俊男,企喺咪前,表演嗚咽無言嘅忍淚絕世內功。
四大俊男嘅內功深厚,識得將道丹田氣,谷上眼眶,然後再用內家陰力,控住泡眼淚,等泡眼淚,谷住喺眼球表面,上下眼皮之間,利用表面張力嘅物理學原理,喺攝影機面前,滴溜溜咁打轉,係都唔滴落塊面。呢鋪忍淚功,重高檔次過忍尿,付出近三百條人命,換來呢幾分鐘嘅深情表演,邊個話董班子六年來冇厘進步?淨係擒日呢場苦情騷嘅忍淚爆眶功,已經可以直迫奧斯卡。
既然係疏忽,冇溝通,咁係醫管局嘅責任,定係衞生署?好似打籃球咁,一係交波嗰個水皮,一係入樽嗰個近視,梗有一瓣要負責。打波都會半場換人,阿董攬住棚海軍水兵團,就攬足六年。連7.1遊行,田少作反,行政會議潰不成軍,阿董都係夾硬補個莎Lin娜,堅持毋須大改組。
分界鴻風趣
暑假兩個幾月,阿董閃身隱形,慢慢學識咗唔蒲頭,𠵱家就嚟立法會復會,又蠢蠢欲動嘞,真係令人好擔心。樓股兩市,已經有啲起色,阿董又一次向全港市民展覽佢嘅舊思維、舊辦事方式、舊家長心態,連講嘢嘅嗰鋪催眠腔,都係同「前沙士」、「前七一」時期一模一樣。香港人,大家前世做錯咗乜嘢事,今世要俾阿董咁樣百般愚弄多番整蠱嘅報應?
強少話諗過辭職,分界鴻又話諗過辭職,可惜個個都係得個「諗」字。唔好諗吖嘛,朱總話,諗咗就要做吖嘛。分界鴻重風趣,佢認為自己有經驗,落咗台,搵過個冇經驗嘅上,又對社會公唔公平呢?
咁即是話,連阿董都有六年失敗嘅「經驗」,與其第三屆新人上位,睇吓阿董嘅經驗反而愈累積愈多,咁阿董豈不是應該一屆屆連任落去,畀佢繼續在職培訓,繼續終身學習,等山頂啲樓市跌到八百蚊一呎,阿董嘅管治課程,亦啱啱好畢業?


傳真︰2623-9278
電郵︰[email protected]